1Th 3 | MHL | STEP | Aria i nia urufowa kema samor maneka ikemik. Naapeya maemik, Timoti sesekamkun neek wiar ikiwinok, ne i iisow Atens-pa feekeriw ikaiyen naimik. Naap maep o sesekamik. Os pun uuwowa fain yiamiya uuwam-miok Krais opor eliwa wia maakem-miawiya. Ni Krais opora baliwep opaka naep os-ke niar ikiwemi nia kekanowinok naemik.

1 Thessalonians 3

Wi wia kekanowowa naep Pol-ke Timoti sesekak

1 Aria i nia urufowa kema samor maneka ikemik. Naapeya maemik, Timoti sesekamkun neek wiar ikiwinok, ne i iisow Atens-pa feekeriw ikaiyen naimik. Naap maep o sesekamik. Os pun uuwowa fain yiamiya uuwam-miok Krais opor eliwa wia maakem-miawiya. Ni Krais opora baliwep opaka naep os-ke niar ikiwemi nia kekanowinok naemik. 3 Naeya nia samo-samorimik nain ni kema unu-unowa me wuowen. Moram ni amisareman, sirirowa sira naap nain i aawem-ikowa-ke. 4 I iiriw ni niamiya ikok nia maakem-ikemik, i unowiya sirirowa aawiyen. Ne ni aakisa pepek amisareman, i sirirowa aawem-ikaimik. 5 Oko Satan-ke sira papako-pa nia mufeya i niamiya ikok uuwamik nain iiwawun yiar orainon. Ni opora opam-ikaiman-i e weetak, yo nain kema suuwam, weetakeya Timoti sesekam, ikip nia urufinok naep.

Timoti-ke wia kekanowak

6 Ne Timoti ikiwep ni niar iki-ikok ekapemi opor eliwa fain yia pekapomak. Feenap maek, wi kekanep opora opam-ikaimik, ne mua oko wia kookalem-ikaimik, naap nia maek. Neemi fain pun yia maakek, i manek akena kema yia suuwiman nain, ne nainiw-ko yia urufu naep kemaiw tuupam-ikaiman, i nia urufowa maimik naap, opora naap yia maakek. 7 Makena, i sirirowa sira-sira aawimik. Nain ni Krais opora baliwep opiwkin i muut nain kekanep naap ikemik. 8 Ne ni kekanep yiena Maneka wiar ikeman, naapeya i kema tenep palanowiw ikemik. 9 Ni muuta nain i Mua Maneka mokoka-pa manek akena kemelimik. Kemelap maimik, “Aa, Mua Maneka sira eliw oram. Sira eliwa naimik nain i me pepek. Kamenap maiyen.” 10 I nia urufu naep anane amirika ne uura naap Mua Maneka faremi nokarimik, era-ko yia imenomaya niar ikiwowa nain. Ikiwemi ni Yeesus Krais ookami opora papako baliwep me amisareman nain nia maakemi kema nia kekanowiyen naep.

11 Aria yo feenap maiyem, yiena Auwa Mua Maneka ne yiena Maneka Yeesus naap era-ko yia wuomiwkin ni niar ikiwiyen naimik. 12 Ne pun yiena Maneka faremi fain nokarimik, nia asipam-ikaeya ni niam kookaliman nain manek akena niam kookalem-ikowen. Ne mua oko pun naap wia kookalem-ikowen, i manek akena nia kookalimik naap. 13 Ne os-ke kema nia kekanowam-ikaeya ni kekanep ikowen. Ni naap ikaiwkin ikoka yiena Maneka Yeesus ona teeria unowiya ekapimik nain Mua Maneka mokoka-pa ni pina marew, dubil manekiw ikowen.